Incorporamos unha nova obra ao noso fondo local. Trátase de “A tradición oral en Salceda de Caselas“, do investigador porriñés Xosé Ramón Paz Antón, que se achegou á nosa biblioteca para doarnos dous exemplares desta a súa nova publicación.
Trátase dun extenso estudo sobre o patrimonio inmaterial do concello veciño, editado pola Deputación de Pontevedra e escrito en dous volumes. O primeiro volume, “Descricións“, é froito dunha recolleita de materiais de hemeroteca, entrevistas, arquivos, fotografías e bibliografía, reunindo a análise sobre un conxunto de tradicións como o ciclo de Nadal, o entroido, os instrumentos musicais, a danza, a emigración, os seráns, o cancioneiro, etc. Inclúe tamén unha extensa colección de fotografías do AMI de Salceda.
O segundo volume, “Catálogo“, recolle un enorme conxunto de coplas populares, romances, cantos de cego, melodías instrumentais de gaita, cantos infantís e outras obras relacionadas co canto e co baile. Tamén outras expresións do folclore popular e un CD con vídeos e audios.
Queremos darlle os parabéns a Paz Antón pola súa excelente investigación e pola exhaustiva publicación que ven de publicar, e as grazas pola súa doazón. Xa podedes consultar “A tradición oral en Salceda de Caselas” na nosa biblioteca.
Biblioteca do Porriño 