desiderataCarné da biblioteca
Espazo persoal online
Consulta en sala
Información bibliográfica
Préstamo
Renovación
Reservas
Propostas de compra
Préstamo de ebooks
Referencia dixital
Alfabetización dixital
Acceso a Internet
Reprografía e impresión

.

Carné da biblioteca

O carné da Biblioteca do Porriño sirve para acceder a determinados servizos da biblioteca, e podes usalo en igualdade de condicións en toda a rede de bibliotecas de Galicia. Co teu número poderás acceder tamén á plataforma de libros electrónicos GaliciaLe e ao teu espazo persoal online, onde acceder a multitude de servizos.

Podes obter o teu carné da biblioteca de dúas formas:

• Presencialmente: nas nosas dependencias, cubrindo este formulario de solicitude(PDF 518KB). Poderás usar o teu carné no prazo dun día.
• Online: a través deste enlace. Escolle a nosa biblioteca no despregable, cubre o formulario e dálle a enviar. Logo terás que presentar  este impreso (PDF 292 KB) asinado na biblioteca.

O carné é gratuíto, persoal e intransferible. Os menores de catorce anos deberán contar co permiso de nai/pai/titor.

¿Que caducidade ten o carné?

No caso dos adultos 5 anos, e no caso dos menores 3 anos.

Eu tiña o antigo carné da biblioteca, ¿o podo seguir usando?

Non te preocupes: mantés a túa condición de socio. Pero debes pasar pola biblioteca para actualizar os teus datos e que che fagamos o novo carné.

Pídenme o meu número de carné, ¿onde podo atopalo?

É o número que aparece na túa tarxeta, debaixo dos apelidos.

¿E podería usar o meu carné en todas as bibliotecas da rede?

Si, en igualdade de condicións e cos mesmos dereitos e obrigas.

 .

.

Espazo persoal online

A través do catálogo online da biblioteca podes acceder ao teu espazo online. Para iso escribe o teu número de usuario da biblioteca e a túa contrasinal. Dende este espazo privado, poderás acceder a multitude de servizos como:

• Informarte dos teus préstamos en activo, dos prazos de préstamo e as datas de vencemento.
• Renovar directamente os teus préstamos
• Realizar reservas
• Realizar suxestións de compra
• Crear lista de libros (tipo “libros pendentes para ler”)
• Acceder ao teu historial de lectura (libros e datas dos teus préstamos pasados)
• Informarse das túas posibles sancións
• Acceder ao teu historial de buscas
• Modificar os teus datos persoais e as túas contrasinais
• Etiquetar e comentar os libros do catálogo

¿Cal é o meu número de usuario e contrasinal?

O número de usuario é o que aparece na túa tarxeta de socio, e a contrasinal chegoute por correo electrónico. Podes cambiar a túa contrasinal desde dentro do teu espazo persoal.

Pero non o recordo o meu contrasinal…

Dende a mesma pantalla do catálogo preme na opción “Esqueceu o seu contrasinal? Prema aquí“. Chegarate unha nova por correo electrónico. [Tes un vídeo explicativo do proceso para restaurar o contrasinal neste enlace]

Non me chegou nada…

Comproba que teñamos a túa dirección de email correcta na biblioteca.

 .

.

Consulta en sala

A biblioteca ofrece máis de 60 postos de lectura na sala de consulta ou sala xeral, 5 postos na sala de prensa, e un gran espazo como sala infantil con varios postos máis. Todos eles poderás usalos para consultar a nosa colección, ler ou estudar, xa que en cada un atoparás estantes onde ofrecemos un conxunto organizado de fondos bibliográficos e audiovisuais. Poderás collelos libremente dos estantes  e consultalos onde queiras, respectando sempre as normas propias da cada sala. Despois de consultalos, por favor, deposítaos nos espazos destinados a tal fin.

¿Onde podo estudar?

Podes estudar na sala xeral, xa que alí atoparás silencio, pero has de ser consciente de que a biblioteca non conta cunha sala de estudo especificamente destinada a tal fin. Na sala de xeral pódese estudar, pero non é unha sala de estudo.

¿E podo usar o portátil en calquera sitio?

Si, onde queiras, pero ves soamente a conectarte, recomendámosche o espazo wifi que atoparás na entrada do edificio. Se usas o portátil nas salas, has de quitarlle o son. Atoparás enchufes distribuídos por cada unha delas.

.

.

Información bibliográfica

Atendemos todo tipo de consultas sobre a nosa colección, para que coñezas os recursos cos que podes contar e podas sacar o maior proveito deles: se temos algunha obra, se imos comprar unha novela nova, os libros que temos de determinado tema, como localizar unha película nos estantes… Para informarte sobre a nosa colección podes consultar directamente o catálogo da biblioteca a través de internet ou ben podes preguntar ao persoal da biblioteca, que estará encantado de botarte unha man naquilo que necesites.

Quero saber si tedes un libro, ¿a través de que medios podo comunicarme con vós?

Podes consultar o catálogo en internet, acudir ás nosas instalacións, chamarnos por teléfono (986337624), enviarnos un email… o que prefiras.

Estou facendo un traballo e quería información sobre un tema, ¿podedes dicirme onde atopar na biblioteca información ao respecto?

Por suposto. Informarémoste, orientarémoste e localizarémosche os documentos que estean dispoñibles na biblioteca sobre ese tema que necesitas.

.

.

Préstamo

O servizo de préstamo ten por obxecto que podas facer uso da nosa colección fóra das instalacións da biblioteca. Practicamente toda a nosa colección é susceptible de ser  prestada, agás dicionarios e as obras da Sección Local. As nosas condicións de préstamo son as seguintes:

• Libros: máximo 5 exemplares por prazo de 21 días, coa posibilidade dunha renovación.
• DVD: máximo 2 exemplares por prazo de 7 días, coa posibilidade dunha renovación.

Pero en toda a rede de bibliotecas poderías levarte un máximo de 20 exemplares en total. Para levar en préstamo, simplemente escolle aqueles libros ou películas que che interesen e preséntaos no mostrador da biblioteca xunto co teu carné de socio.

No caso de que te pases na data de devolución, serás automaticamente sancionado: 1 día de suspensión por cada día de atraso e exemplar. A suspensión supón non poder levar en préstamo, renovar nin reservar en toda a rede de bibliotecas.

¿Que pasa si necesito máis tempo?

Podes renovar os teus préstamos, pero os exemplares han de estar sempre dentro do prazo establecido.

¿Tedes préstamo interbibliotecario?

Non temos.

¿E se perdo o libro?

Se extravías un libro deberás informarnos, e proporcionarémoste os datos da obra para que podas comprar outra nova e repoñela.

.

.

Renovación

No caso de que necesites máis tempo para ler un libro ou visionar un DVD podes renovalo. Poderás facelo de tres formas: presencialmente, telefonicamente (986337624) comunicándonos os teus datos de usuario, ou ben directamente online a través do teu espazo persoal. 

[vídeo explicativo para facer renovacións online]

Poderás efectuar as túas renovacións dende 5 días despois do préstamo ata o día de vencemento. Soamente se pode renovar unha vez, e nunca si o libro/DVD foi reservado por outra persoa. Tampouco si o usuario está sancionado ou ten préstamos fóra de prazo.

 ¿E non hai forma de poder telo máis tempo?

Si xa o tes renovado unha vez debes devolvelo na biblioteca. Trátase dunha medida de control. Despois de facelo, o poderías levar en préstamo de novo no caso de que non estea reservado.

.

.

Reservas

Se queres un libro/DVD, pero está prestado, podes reservalo. Poderás facelo de tres formas: presencialmente, telefonicamente (986337624) comunicándonos os teus datos de usuario e do libro/DVD, ou ben directamente online a través do teu espazo persoal.

Aínda que podes facer unha reserva dende calquera biblioteca que pertenza á nosa rede, ten en conta que as reservas que fagas na nosa biblioteca debes recollelas na nosa biblioteca (non hai préstamo interbibliotecario), no prazo de 3 días, senón serán canceladas. Soamente podes reservar exemplares que estean prestados, e na nosa biblioteca soamente poderás ter en reserva un máximo de 3 libros e 2 DVD ao mesmo tempo.

Fixen unha reserva, pero está tardando demasiado…

Pode ser que outro usuario reservara o mesmo exemplar antes ca ti. Ou mesmo varios usuarios. Non te preocupes que en canto te toque, serás avisado.

Reservei  o libro “Cousas” de Castelao, non me avisaron e no catálogo aparece dispoñible…

As reservas fanse sobre un exemplar en concreto, e nós temos varios exemplares de “Cousas” na biblioteca. Probablemente a túa reserva estea activa, pero sobre outro exemplar. 

Fixen unha reserva, pero fun a biblioteca e non estaba preparada…

Pasou que tardaches máis de tres días en vir. Agora o libro estará de novo nos estantes, ou prestado a outro usuario: nese caso poderías reservalo de novo.

.

.

Propostas de compra

Si non temos algún libro que che interese podes facer unha proposta de compra a través do servizo de desideratas, cubrindo unha solicitude (que podes descargarte aquí (PDF 636KB)) ou preferiblemente a través do teu espazo persoal. A túa suxestión será oportunamente valorada, e no caso de aceptarse, serás avisado en canto o libro esté dispoñible. Pero has de ser consciente de que unha desiderata é soamente unha proposta, non supón un compromiso de compra. No caso de non ser aceptada (obras que non se axustan á colección, obras de temática moi específica, exemplares moi caros, obras descatalogadas, non publicadas, imposibles de servir…) a biblioteca non ten que xustificarse.

Tamén podes facer as túas propostas de compra directamente online a través do teu espazo persoal. Soamente tes que ir á pestana da esquerda “As súas propostas de compra”, cubrir o formulario coa maior información posible e envialo.

¿Avisádesme cando cheguen os libros que pedín?

Si, avisámoste cando cheguen e avisámoste se non os podemos conseguir.

Pedín algúns libros e non os compraches, ¿por que?

Has de ser consciente de que unha desiderata non supón un compromiso de compra: é unha proposta de compra. En todo caso, garantímoste que se usan criterios estritamente profesionais para decidir os libros que se poden comprar e os que non.

.

.

Préstamo de ebooks

A biblioteca ofrece préstamo de ebooks a través da plataforma de préstamo de libros electrónicos GaliciaLe. Trátase dun servizo independente do préstamo físico de libros ou películas, e cunhas condicións de uso específicas. GaliciaLe proporciona un servizo de préstamo temporal de obras en formato dixital de temáticas diversas (ficción, informática, historia, ocio etc.), en castelán e galego e para todas as idades. Os socios da biblioteca anteriores ao 14 de outubro de 2014 poden rexistrase directamente neste servizo a través deste enlace, mentres que os que se fixeron socios con posterioridade a esa data serán rexistrados pola biblioteca.

Para poder acceder ao préstamo de ebooks, deberás ter un dispositivo compatible (tableta, ordenador persoal, lector de libro electrónico, teléfono móbil etc.) e unha conta de correo electrónico. Tamén deberás ter activa unha conta de AdobeID e unha aplicación de lectura (recomendamos Adobe Digitals Edition). Poderás tomar en préstamo ata un máximo de dous libros en cada catálogo (dous no catálogo do libro en galego e outros dous no catálogo do libro en castelán) que estarán á túa disposición durante un prazo de 21 días. Se a obra ou obras que buscas están prestadas, poderás solicitalas en reserva (ata un máximo de dúas).

¿Como podo saber os libros que teño en préstamo ou reservei?

A través do teu espazo persoal. Podes acceder coa túa conta de usuario (o nº do DNI sen letra) e o teu contrasinal. Alí terás toda a información que necesites.

Esquecín o meu contrasinal, ¿como fago?

Accede a este enlace, e introduce o teu número de usuario.

¿Onde podo recibir máis información sobre este servizo e os diferentes procesos?

Recomendámoste que consultes o manual de usuario de GaliciaLe.

.

.

Referencia dixital

A biblioteca ofrece aos seus usuarios un conxunto de obras de referencia online a través da rede de bibliotecas de Galicia. Poderás acceder a estes recursos electrónicos a través da túa conta de usuario (o teu número de socio da biblioteca) e contrasinal (un dos teus apelidos).

Os recursos dispoñibles a través deste servizo son e_Junior.NET (Enciclopedia electrónica dirixida aos rapaces de primaria e primeiro ciclo de secundaria, adecuada aos contidos curriculares que se desenvolven nestas etapas), Aula Planeta (o maior banco de contidos dixitais en lingua española, que conta con innumerables materiais de consulta de todas as áreas do coñecemento cunha ampla oferta audiovisual -galería multimedia con fotos, vídeos, interactivos, audios…-, dicionario multilingüe, estatísticas, temas de actualidade etc.), Gale Virtual Reference Library (obras de referencia en formato electrónico en español) e Hemeroteca Dixital Iconoce de Sarenet (servizo de novas aparecidas en medios dixitais de todo o mundo: prensa, publicacións especializadas en economía, deporte, tecnoloxía… , blogs e confidenciais).

 Teño problemas para entrar cos meus datos

Comproba que estés escribindo ben o teu nome de usuario (nº de socio da biblioteca) e a túa contrasinal (calquera dos teus apelidos)

.

.

Alfabetización dixital

A biblioteca é un espazo de de capacitación e formación nas competencias da información dixital arredor do libro e da lectura, pero tamén, de modo xeral, nas competencias para que o cidadán se desenvolva socialmente de forma íntegra. Somos mediadores na aprendizaxe da cidadanía. Deste xeito, realizamos actividades formativas sobre o uso dos diferentes dispositivos tecnolóxicos (ordenadores, tablets, móbiles…), das distintas ferramentas (apps, servizos, comunidades virtuais…), ou na busca, selección e xestión de contidos en formato dixital. A biblioteca realiza esta alfabetización de modo presencial nas nosas instalacións a través de cursos, obradoiros e charlas, pero tamén de modo remoto na web, con videoformación e información na nosa páxina web e redes sociais.

Gustaríame aprender máis no uso de ordenadores e internet, ¿facedes cursos?

Si, temos un programa anual de formación no uso da informática e de internet, para varios niveis e para distintos sectores de idade. Consulta as nosas actividades ou ponte en contacto connosco.

Quería instalar una app de lectura de ebooks no meu smartphone, ¿podedes aconsellarme algunha?

Podemos, ponte en contacto connosco ou ben consulta o noso blog, onde imos publicando información sobre distintas apps e servizos dixitais sobre o libro e a lectura.

.

.

Acceso a internet

Na biblioteca poderás ter acceso a Internet por banda ancha a través de dous tipos de servizos. Por un lado poderás acceder vía wifi libremente en todas as instalacións do edificio, e especificamente no espazo wifi da planta baixa, reservado para o uso de portátiles e outros dispositivos móbiles. Para facelo conéctate á rede de nome “Biblioteca”: atoparás carteis indicando o contrasinal, e se non, pregúntanos.

Por outro lado, os socios da biblioteca tamén poderán acceder a internet, a programas de ofimática e imprimir documentos a través de catro terminais informáticas localizadas no interior da biblioteca. Este servizo ten unha limitación dunha hora ao día por usuario, e os menores de 16 años deben estar acompañados en todo momento por un adulto responsable.

 ¿Onde tedes maior cobertura?

No espazo wifi. Se ves soamente a conectarte, recomendámoste conectarte dende alí.

.

.

Reprografía e impresión

A biblioteca dispón de servizo público de reprodución reprográfica. A súa exclusiva finalidade é proporcionar fotocopias de documentos pertencentes á colección da biblioteca do Porriño. Non fotocopiamos outros documentos alleos aos nosos fondos (apuntes, documentos persoais, exemplares doutras bibliotecas, etc) e en todo momento se respectará a lexislación vixente en materia de propiedade intelectual, coas limitacións que iso supón. As fotocopias serán realizadas, previa solicitude, polo persoal da biblioteca, de forma estándar, en formato DIN A4, en branco e negro, e teñen un custo por páxina de  7 céntimos de euro.

Tamén podedes imprimir os documentos que queirades dende os ordenadores públicos da sala de consulta, previa solicitude, e co mesmo custo das fotocopias.