Temos un novo espazo expositivo no vestíbulo de entrada da biblioteca. Trátase do Recuncho, un estante onde iremos organizando pequenas exposicións arredor de diversos temas, sempre cos libros de por medio. Inauguramos O Recuncho cunha exposición de amigurumis de Nieves Rodríguez Ucha.
¿Que é o amigurumi? Pois un movemento procedente de Xapón, que consiste en tecer pequenos bonecos mediante técnicas como o crochet ou a labor de gancho. Normalmente trátase de pequenos animais, pero tamén poden tecerse outras formas como plantas, froitos, robots ou comida. O amigurumi non é soamente un pasatempo de moda, senón que ten un trasfondo ou filosofía detrás, baseada na cultura xaponesa kawaii, que podería traducirse como “mono”, “tenro”, ou “adorable”. Os bonecos tecidos, os “amigurumis”, son algo así como a materialización do espírito infantil que todos temos dentro, e moitos cren que cada amigurumi posúe un alma que protexe e consola ao seu propietario nos momentos difíciles.
Para quen non queira ir máis alá, os amigurumis son pequenos e entrañables bonecos tecidos cunha enorme habilidade, e que moitas veces presentan un punto de ironía e comicidade. No Recuncho expoñemos amigurumis realizados por Nieves Rodríguez Ucha, unha verdadeira mestra da la e das agullas da que podemos ver un bo conxunto de obras, principalmente amigurumis de animais, cun toque satírico e tecidos cunha técnica impresionante.
Ademais dos amigurumis, expoñemos diversos libros sobre amigurumis, que estarán dispoñibles para a consulta e o préstamo en canto remate a exposición no Recuncho:
- Mascotas de ganchillo : animales de ganchillo tiernos, simpáticos e imaginativos / Kerry Lord.
- Mis animales de ganchillo : tejer a ganchillo tus animales y sus accesorios, con más de 40 proyectos / Isabelle Kessedjian
- Amigurumi xxl : 18 proyectos fáciles de hacer con cuerda y ganchillo / Mariale Montero
- Aves de ganchillo : cuarenta nuevas mascotas tiernas, simpáticas y divertidas / Kerry Lord
- Amigurumis : 20 robots para hacer a ganchillo / Nelly Pailloux
- Amigurumi para la casa / Ana Paula Rímoli
Biblioteca do Porriño 